Egoitz URRUTIKOETXEA
Egoitz_urrutikoetxea
Macronen “fartsa” handia

IRITZIA- Emmanuel Macron Frantzia Estatuko presidenteak abiatu duen “eztabaida handia” aipagai izan du Egoitz Urrutikoetxeak. Bere aburuz, “gobernuak ez du herritarren aldarrikapenei baikorki erantzuteko xederik”.

29/01/2019 06:40 | 0 commment

Macronen Gobernuak urtarrilaren 15ean abiatu du "eztabaida handia". Frantziako herritarren iritziak jaso nahi omen ditu. Alta, iritzi horiek aspaldi huntan karrikan ozen bezain garbiki ageri dira. Belarriak eta begiak zabaltzearekin aski dute herritarren deidarraz jabetzeko. Justizia soziala eta justizia fiskala aldarrikatzen dituzte. Inguramena eta jendetasuna suntsitzen dituen sistemaren lerratzea deitoratzen dute.

Zoin da beraz helburua? Gobernuak haserre sozialaren ura bere errotara bideratu nahi du. Izan ere, gaur-gaurkoz Frantziako gobernuak ez du herritarren aldarrikapenei baikorki erantzuteko xederik. Alde batetik, Konstituzioan txertatu duten zorpetze mugak (urrezko arauak) baimentzen ez diolako; eta bestetik, botere guneetan dauden arduradunak kapital globalizatuaren eta finantza munduaren eskupekoak direlako.

Macronen hautabidea azken hamarkadetan izandako gibelkoiena eta bortitzena da. Frantziako eredu sozialaren azken arrastoak metodikoki desegiten ari da. Eta bere jarrera erdeinuzkoa izaten ari da, bortitza bezain harroa. Klase mespretxuaren adierazgarri.

Agintera heldu denetik sindikatu eta gainerateko herri kolektiboak oro mespretxatu ditu. Bere gobernatzeko eredua bertikalitatean oinarritzen da, eta monarkiatik gehiago du ustezko errepublika demokratikotik baino. Emmanuel Macronen autoritarismoak demokraziaren anorexia irudikatzen du.

Macronen agintaldiaren beste ezaugarri bat polizia bortizkeriaren erabilera sistematikoa izaten ari da. Jaka horien aurkako bortizkeria asumitua ez da gertakari isolatu bat. Notre dames des Landes-eko ZAD gunean antolatu zuen indar erakustaldi polizial eta militarra, Bures-en eraikitzen ari diren zikindegi nuklearraren aurka protestan ari diren kolektiboekiko jazarraldia, edo Italiako mugan migranteak ehizatzeko polizien bortizkeria, lerratze sekuritarioaren adibide argigarriak dira.

Normandian eta Lot eskualdean bertako hautetsiekin bildu berri da Macron, poliziaz setiaturiko bilkura geletan. Eztabaida handiaren abiatzea irudikatu nahi izan du. Haatik, hautetsien arrengurak entzutera baino, bere hautuak justifikatzeko bakarrizketak egitera joan da. 

Funtsean, gobernuak osatu duen gidoiak herritarren artean sortzen hasi den eztabaida agortzea du xede. Izan ere, Jaka horien bertute nagusia, herritarrei elkarguneak proposatzea izan da, soziabilitate eta eztabaida gune berriak eskaintzea. Indibidualismoa elikatzen duen armiarma-sarea hausteko bidea zabaldu dute. Gidoirik gabe, herritarrek beren hitza adierazteko parada aurkitu dute. Eta hitz askatze horren beldur da Estatua. Ez du eztabaida librerik nahi.