Adingabeko bi ginearrei buruz egindako ebaluazioak salatu ditu Bizik

Bizik adingabeko etorkinei buruz egindako ebaluazioetaz arduratzen den Isard Cos egituraren egoitza okupatu du urtarrilaren 7an, Pauen. Ekintzaren bidez, erakundeak bi ginear gazteren adinaz egindako balorazio “susmagarria” salatu du. Zuzendariak aitortu du Isard Cos erakundeak ez zuela judiziala den lan hori egin izan behar.

Kazeta|09/01/2019 06:35|0 commment
Med_bizi_ekintza_isard-cos_etorkinak_paue_imiquelestorena01
Isard Cos egituraren egoitza okupatu du Bizik hiru orduz. © Isabelle MIQUELESTORENA

Bere galderei erantzun bat atzemateko nahiarekin, hitzetatik ekintzetara pasa eta Isard Cos egituraren egoitza okupatzea erabaki dute Biziko hogeita hamar militantek urtarrilaren 7an. Hiru orduz, etorkinen adina aztertzeko duen metodoa salatu dute, batez ere bi ginearren inguruan egindakoak. Pauen kokatua den erakundea Pirinio Atlantikoetako Departamenduko Kontseiluarekin elkarlanean ari da. Afera grabea izan daiteke, bi gazteak hamabost egunez presondegiratu baitzituzten adindunak kontsideratu zituztelako, nahiz eta haiek kontrakoa ziurtatu.

Departamenduko Kontseiluak dioenez, Koivoqui Moriba eta Joseph Moribak adingabetuak zirela deklaratu zuten administrazio frantsesaren onurak jaso ahal izateko. Hori leporaturik, beren kontrako salaketa bat aurkeztu zuen. Kasua aztertu eta, Baionako delituen auzitegiak adingabetuak zirela eta ez zela kasua aztertzeko gai ebatzi zuen.

Ondoren, bi gazte ginearrek babes eskaera bat egin dute, eta horretarako adinari buruzko ikerketa agindu du haurren epaileak. Txostenean zein beste dokumentu batzuetan oinarrituz, adingabeen epaileak Joseph Moriba adingabetua dela baieztatu du, ez ordea Koivoqui Moriba. Azken honen abokatuak aurkeztutako helegitea aztertuko du justiziak urtarrilaren 9an, Pauen.

Biziko militanteek Isard Cos gazte hauen balorazioa egiteko erabilitako dokumentuen irakurketa okerra dela gaitzetsi dute. Hain zuzen, ebaluazio irizpideek "zalantzak" sortzen dituela salatu dute. Manipulazio zantzuak ikusten ditu Bizik bi gazteen espetxeratze aginduaren atzean eta, ondorioz, ebaluazioaren gibelean nor dagoen jakin nahi du.

Egituraren gaitasun eza

Bere aldetik, Philippe Ellias egiturako zuzendariak ondokoa baieztatu du telefonoz Biziko militanteekin izan duen elkarrizketan: "Gure egiturak ezin ditu arlo juridikokoak diren ebaluazioak egin. Ez genituen egin izan behar". Bizik akats horiei buruz "gaitasun eza ala manipulazioa" izan diren jakin nahi du. Ebaluazioen sinesgarritasuna zalantzan eman du.

Zuzendariak departamenduarengandik presiorik jaso ez duela nabarmendu du eta xehetasun gehiago ematea errefusatu du, batez ere ez duelako kasua zehazki ezagutzen. Jean-Noël Etcheverryk Bizik egindako analisiaren kopia bat eman eta hitzordu bat galdegin dio.

Egoeraren larritasunaz zein urgentziaz ohartarazi du mugimenduak. Koivoqui Moriba ez bada adingabetu gisa ezagutua, afera Giza Eskubideen Europako Auzitegiraino eramateko prest agertu da.