Berri Txarrak: azken txanpa hastera doa

Musika talde nafarrak bere etena iragarri ondotik, azken biraren lehen kontzerturako datak jakinarazten ari da. “Ikusi Arte Tour 2019” Biarritzetik iraganen da heldu den otsailaren 16an, Seaskaren 50. urteurrenaren karietara. Azken kontzertua berriz, Iruñean izanen da, 2019ko azaroaren 23an.

Kazeta|24/12/2018 07:45|0 commment
Guz_ehz04_bobedme153
Berri Txarrak taldeak EHZ 2015 jaialdian jo zuen. © Bob EDME

Berri Txarrak zaleak “Ikusi Arte Tour 2019” bira heltzeko gogoz dira. Oraingoz data guti ezagutarazi badituzte ere, jadaneko jakina da 25 urteko ibilbidea egin duen musika taldearen azken kontzertua: azaroaren 23an izanen da, Iruñeko Nafarroa Arena erabilera anitzeko gelan.

Sartzeak salgai zirela jakin bezain fite, abenduaren 19an web ataria blokatu egin zen. Talde nafar ezagunaren zaleak azken kontzerturako sartzeak erosten alferrik entseatu baziren ere, arazo teknikoak ordu gutiren buruan konponduko zirela iragarri zuten. Azkenean, abenduaren 23an salmenta berriz ireki eta minutu gutxira sarrera guztiak agortu ziren.



Otsailaren 16an Biarritzen

Taldeak ofizialki jakinarazi ez badu ere, “Ikusi Arte Tour 2019” birak Ipar Euskal Herria ere zapalduko du. Heldu den otsailaren 16an izanen da, Biarritzeko Irati gelan, Seaska ikastolen federazioaren 50. urteurrena dela eta. Willis Drummond izanen dute eszenan lagun, espero diren milaka zaleren gozamenerako.