Frantxoa Garat apez abertzalea zendu da

74 urte zituela eta eritasun luze baten ondotik zendu da Ipar Euskal Herriko apaizeriaren erreferente izan den Frantxoa Garat. Hazparnen sortua, Euskal Herriarekin engaiaturiko apezetako bat izan zen.

Kazeta|08/12/2018 14:00
Capture_d_e_cran_2018-12-07_a_17
Frantxoa Garat.

Frantxoa Garat apez hazpandarra hil da. Betidanik bere herriarekin engaiaturik, 1992an presondegian sartu zuten, euskal errefuxiatuak aterpetzeagatik. Ezpeletan bere misioari ekin zion garaian izan zen hori. Nuntzio apostolikoak presondegira bisitatu zuen, bere alde eginez eta garai hartako apezpiku zen Pierre Molèresek ere babesa eman zion. Gauza bera egin zuen André Darraidou Ezpeletako auzapez izandakoak. Preso zen bitartean Lapurdiko herrian egin zen mezan 700dik goiti lagun bildu ziren.

Frantxoa Garat Herriarekin taldearen sortzaileetako bat izan zen. Apez talde honek Euskal Herriaren geroari buruzko gogoeta politiko eta teologikoa sustatzen du. Hainbat parrokiatan apez izan zen, hala nola, Armendaritzen, Donibane Garazin eta azkenekoz, 2017ra arte Senperen.

Mikel Epalza apezak aski hunkiturik hartu du Garaten heriotza. Azken hatsera arte bere ondoan izan zen. “Engaiamendu handiko gizona zen, ebanjelioaren baloreak bizi zituena, presondegira eramateraino. Anai Artea elkarteko kide ere izan zen eta Donejakue bidean oso sartua zen. Bake eta konbikzio handiko gizona”, adierazi du Epalzak. Frantxoa Garaten aldeko hileta heldu den abenduaren 10ean izanen da, arratsaldeko 15.00etan Hazparneko elizan.