Kazeta

Kataluniako independentzia deklarazioa bozkagai

Junts pel Si eta CUPeko alderdiek independentzia deklaratu eta prozesu konstituziogilea abiatzea proposatu dute. Alderdien proposamenak bozkatuko dituzte 13.30ak aldera abiatu den Legebiltzarraren osoko bilkuran.

Alderdien proposamenak bozkatuko dituzte Legebiltzarraren osoko bilkuran.
Alderdien proposamenak bozkatuko dituzte Legebiltzarraren osoko bilkuran.

Egun erabakigarria da Katalunian. Senatuak Konstituzioaren 155. artikuluaren neurriak eztabaidatzen dituen bitartean, Kataluniako Legebiltzarraren osoko bilkura iragaiten ari da Bartzelonan. Eztabaidan, alderdiek beren proposamenak aurkeztu eta bozkatuko dituzte. Junts pel Sik eta CUPek errepublika katalana aldarrikatu eta prozesu konstituziogilea abiatzea proposatuko dute.

Aipaturiko bi alderdi independentistek eskakizun bereziak eginen dizkiote Parlamentuari. Generalitateari eskatuko diote independentzia burutzeko tramiteak abiatzea. Herritarrei informazioa eskaini eta estatu independente baterako beharrezkoak diren azpiegiturak martxan jartzea.

Ciudadanos alderdiak zein PPko Xabier Garcia Albiol diputatuak independentziaren aldeko bozketan parte hartuko ez dutela azaldu dute sare sozialen bidez.

Legebiltzar katalanaren osoko bilkura bederen bi aldiz gibelatu eta, 13.30ak aldera Carme Forcaldelle Legebiltzarreko presidenteak hasiera eman dio bilkurari. Alderdi bakoitzak hamar minutu izanen ditu beren proposamenen berri emateko.

Eztabaida hasi baino lehen, milaka herritar Legebiltzarraren aitzinean batu dira. Gisa berean, Kataluniako 200 bat auzapez Legebiltzarrean elkartu dira. Gertatutakoa azaldu ondoren, independentziaren aldeko ohiuak nagusitu dira aretoan.

155. artikulua, aitzina

Bitartean, goiz honetatik, Senatuan 155a ezartzeko neurriak eztabaidatzen segitzen dute. Mariano Rajoy Gobernu espainiarreko presidenteak artikulua martxan jartzeko neurriak defenditu ditu. Urriaren 1ean iragan zen erreferenduma legez kanpokoa izan zela ohartarazteaz gain, 155aren helburu nagusia "elkarbizitza berreskuratzea" dela nabarmendu du.

Hainbat hedabide katalanek zabaldu dutenez, independentzia deklarazioa onartzeko bozketan parte hartzen dutenen kontra jotzeko prest izanen litzateke fiskaltza. Horiei "matxinada" leporatuko lieke.