"Presoen eskubideen defentsarako engaiamendua eta gatazkaren konponbide politiko demokratiko eta pazifikoa aitzinaraztea". Hauek dira otsailean abiatutako Bagoaz kolektiboaren helburuak. Taldeak adierazi du, besteak beste, baldintzapeko askatasunen inguruko dinamika bat abiatuko duela. Horri lotua, kolektiboak Estatu frantsesak Hego Euskal Herriko bi presoei ukatutako baldintzapeko askatasunak salatu ditu.

Josetxo Zeberio, Oihana Garmendia eta Itxaso Zaldua, Bapaume eta Roannen preso diren herritarren baldintzapeko askatasunak ukatu dituzte. Alde batetik, Josetxo Zeberioren eskaera onartua izan da, baina horren aitzinean prokuradoreak dei egin du. Bagoaz kolektiboak zehaztu du martxoaren 17an iraganen dela gaiari lotutako auzia.

Oihana Garmendia eta Itxaso Zalduaren eskaerak errefuxatu dituzte eta dei auzia itxoiten dute. Bagoazen arabera, "dozier juridikoak onak dira" eta "presondegi munduko pertsonalitate desberdinen abisu baikorrak dituzte". "Epaileak arrazoi politikoengatik galdeak ez ditu onartu", zehaztu du kolektiboak. 

"Arrapostu hauetan argiki Euskal Herriak bizi duen prozesuari frantses agintariek duten ukazioa adierazia da". Bagoazen arabera euskal preso hauen eskaerak ukatuz, "bake prozesuari duen ukazioa" adierazia da. Kolektiboak aldarrikatu du "giza eskubideen urraketa" dela eta epaileari "bakearen bideak pausuak" emaitea galdegin diote.