APHP Pariseko Ospitaleak erakundeak Hendaiako Sasiko Gaztetxearen kontra aurkeztutako salaketa aztertu du epaileak. Gaiari buruzko deliberoa ekainaren 7an jakinaraziko duela iragarri du Gaztetxeko kide batek.

Auzia iragan den bitartean hamarnaka gazte elkartu dira egitasmoari eta gazteei sostengua helarazteko. "Sasiko ez duzue hilko" mezua islatzen zuen pankarta eutsi dute ekimenean parte hatu dutenek.

@SasikoGztx kideen hitzartzea epaitegi aitzinean ''(...)hiltzen lortzen badute, beste proiektu batzuen sortzen balio izan dezala!'' pic.twitter.com/tV05S9ti6o

— Aitzina Antolakundea (@Aitzinagazte) May 3, 2017

Elkarretaratzera hurbildu direnenaz gain, Hendaian biltzen taldeak ere babesa adierazi nahi izan die. Gainera, gazteen kontrako karguak "altxatuak izan daitezela" eskatu du. Mugimenduaren aburuz, eraikinaren okupazioa "gaur egungo arazo baten emaitza da". Hain zuzen, badira urteak gazte hendaiarrek lokal bat aldarrikatzen diotela Herriko Etxeari.

"Horrelako leku bat beharrezkoa da nahi dituzten aktibitate guztiak antolatzeko: bilkurak, elkarrizketak, debateak, kontzertuak, tailerrak…", azaldu du agiri batean. Iazko ekainean eraikina okupatu zutenez geroztik, etxea berritzeaz gain, programazio anitza proposatzea lortu dute gazteek.