Kataluniako Legebiltzarrak independentzia deklaratu zuen egunean, kontseilariak kargugabetu zituen Mariano Rajoyk. Horrez gain, Kataluniako Parlamentua desegin eta abenduaren 21ean hauteskundeak iraganen direla iragarri zuen. Carme Forcadell Legebiltzarreko presidenteak desegintzat eman du Parlamentua urriaren 30ean. Jose Manuel de la Maza Estatu espainiarreko prokuradoreak salaketak aurkeztu dituela iragarri du.
Carles Puigdemont Generalitateko presidentea Bruselan dagoela argitaratu dute hainbat komunikabidek goiz honetan. Puigdemont asilo politikoa eskatzeko Belgikara joan omen da, La Sexta hedabideak dioenez. Presidenteak Belgikatik agerraldi bat egin dezakeela zabaldu du Catalunya Radiok.
Oroitarazi behar da, Theo Francken Belgikako Asilo era Migrazio Estatu idazkariak Puigdemonti babesa emateko aukerari ateak ideki zizkiola igandean. Horren berri jakin bezain laster, Charles Michel Lehen ministro belgikarrak aukera baztertu zuen.
Madrilera deklaratzera
Salaketak Kataluniako Generalitateko zein Parlamentuko mahaiko kideen kontra aurkeztu dituela azaldu du Estatu espainiarreko prokuradoreak. Gobernuko kideen kontrakoak Auzitegi Nagusian aurkeztu ditu. Legebiltzarreko mahaiko kideen aurkakoak, ordea, Audientzia Nazionalean.
Auzitegi Nagusian aurkeztutako salaketa Carmen Lamela epailearen esku gelditu da. Oroitarazi behar da hark zituela Jordi Cuixart Omnium Cultareleko presidentea eta Jordi Sanchez ANC Biltzar Nazional Katalaneko lehendakaria presondegira bidali.
Aipaturiko erakundeetako kideei "matxinada, sedizioa eta diruaren erabilera txarra" leporatu die. Hori dela eta, Generalitateko eta Legebiltzarreko mahaiko kideek deklaratzea joan beharko dute Madrilera.