Seaskak heldu den ikasturteari begira duen arazoaren berri eman zuen aurtengo Herri Urratsen. Hogeita lau irakasle postu berri eskatu ditu. Hasiera batean, soilik zortzi eskaini nahi zizkion Estatuak. Pierre Barrière departamenduko ikuskariak baieztatu duenez, azkenean, hamabost eskaini dizkio Seaskari. Paxkal Indo elkarteko lehendakariak aipatu duenez, nahiz eta berria "ez den ezkorra", bi eskakizun zehatz lortu arte ez dituzte negoziaketak itxitzat joko.

Seaskak agiri baten bidez jakinarazi duenez, Manex Erdozaintzi Etxart kolegioan ideki nahi duen Inklusiorako Egitura Pedagogikoa (IGP) idekitzea debekatu diote Paueko ikuskariak eta Bordeleko Errektoretzak. 

Azpimarratzekoa da, Baxe Nafarroa zein Xiberoan ez dagoela IGP egiturarik. "Pierre Barriere Akademia inspektorearen arabera, behar bereziak dituzten 11 eta 12 urteko hiru haurrak, goiz guztiz kostaldera joan behar lukete, eta arratsero barnekaldera itzuli. Zergatik jadanik zailtasunetan diren haurrei ikasteko zailtasun gehiago ezarri? Zergatik euskaraz ikasten segitu nahi duten haur horiek frantses eskoletara joan daitezen behartu?", galdetu du elkarteak.

Horrez gain, Bernat Etxepare lizeo berriko Lanbide Heziketan aurreikusiak ziren bi sailetatik bakarra idekitzeko baimena eman diote. Elkarteak nabarmendu duenez, Errektoretzarekin batera gutienez bi sail idekitzea adostua zuen, hots, sozial arloa eta komertzioa. Eta orain euskaraz komertzioa ikasi nahi duten ikasleen parean ez dugu irakaslerik izanen, lehen urtetik ez direlako 10 ikasle izanen? Zergatik haur euskaldunek ezin dute euskaraz ikasi?", aipatu du Seaskak.

Arazoa: "kudeaketa"

Indok dioenez, aipaturiko egitura baita bigarren saila ere idekitzeko baimen administratiboa ukatu dio Hezkuntza Ministeritzak. Azpimarratu duenez, ikasle batzuek jadanik izena eman dute sailetan. Bere aburuz, kudeaketa arazo garrantzitsu bat dago. Hezkuntza Ministeritzak pedagogia alde batera utzi eta lanpostuen kopuruari lehentasuna ematen dio.