Apirilaren 30ean Baigorrin iraganen den Nafarroaren eguna berritasunez josia dator. Aurten herriko etxeko plazan iraganen den ekimenaren egitarauak indar berezia emanen dio aniztasunari. Belaunaldi guzien gustuak asetzeari. Urtean zehar abiatutako bidetik, Tafallako herritarrei harrera berezia eginen diete. Gainera, ospakizunean indarkeria sexisten kontrako jarrera sustatuko dute plantan ezarriko duten protokolo baten bidez.

"Karsuki, alaiki, herria eraiki!". Gaurkotasunaren ildoa segituz, herritarrek, beren kabuz, lortutakoa nabarmendu nahi du Basaizeak. "Kultura eta hizkuntza sustatzeko tresna gehienak guk lortu ditugu, herritarrok. Beti itxoin dugu instituzioek ezagupena ematea, gauzak eraikitzea, baina azkenean, bakarrik egin behar izaten dugu", azaldu du Amaia Castorene elkarteko kideak. "Alaiki" hitzarekin, baigorriarrek "lan horretan plazera hartzen" dutela erakutsi nahi izan dute: "eginkizun horretan bat egiten dugu". Gaztearen erranetan, azken hilabetetan gizarte zibilak bultzatutako desmartxek leloari zilegitasuna eman diote.

Justuki, gertakari horiek Basaizeak asteazkenean 20.00etan antolatu duen lehen ekimeneko protagonistak izanen dira. Hain zuzen, "Herria eraiki" lelopean Ortzaizen antolatu duen eztabaidak gizarte zibilaren engaiamenduari buruz gogoetatuko du. Horretarako, desmartxetan parte hartu dutenen lekukotasunak bilduko ditu: Mizel Bergouignan (Bakegileak), Angel Oiarbide (Gure Esku Dago), Begoña Uharte (Ongi etorri errefuxiatuak) eta Dominique Amestoy (ELB-Lurzaindia). 

Tafallarekin, bat

Igandea baino lehen, "Sinfo Niko" gaualdiak eskualdeko artistak bilduko ditu apirilaren 29an 21.00etan Baigorriko elizan. Azken bi urteetako zikloari amaiera emateko, errepertorio klasikoaren laburpena taula gainera eramanen dute orkestra sinfoniko baten laguntzaz.

Biharamunean, Nafarroaren Egunarentzat, adin guzientzat zuzenduriko egitaraua prestatu du Basaizeak. Egitarau "izugarri aberatsarekin" giroa azkartu nahi izan duela aipatu du Castorenek. Musika estilo guziak Baigorrin gaindi entzunen dira. Haatik, aurten ekimen guztiak herriko etxeko plazan iraganen dira. "Gure xedea jendea gurutzatzea da. Giroa azkartu nahi izan dugu", erantsi du. 

Giro horretan, besteak beste, Tafallako lagunak presente izango dira. Baigorrirekin senidea den hiriko herritarrei harrera berezia eginen diete Nafarroaren Egunean. Urte hauetan berreskuratu duten harremanean pausuak eman nahi dituztela erran du.

"Eraso sexistarik ez"

Aurtengo edizioak eraso sexisten kontrako jarrerei arreta berezia eskainiko die. Basaizeak protokolo berezi bat plantan eman du. Hau da, taberna bakoitzak formakuntza bat segitu du zerbait gertatuz gero zer egin behar den jakiteko. Halaber, herrian zehar "bestak dena justifikatzen ez duela" oroitaraziko duten pankartak jarriko dituzte. Gainera, Basaizeako bi kide gaiaz arduratuko dira eta telefono zenbakiak eskura jarriko dituzte salaketak aurkezteko.

Amaia Castorenek azaldu duenez, urtean zehar dinamika garatu nahiko luke Basaizeak. Eztabaidak antolatzeaz gain, filma proiekzioak ere proposatu nahiko lituzke. "Tematika itzaletik atera nahi dugu", gehitu du.