LABeko militanteek ekintza bat burutu dute Angeluko Direccte (Enpresa, lehia, kontsumoa, lana eta enpleguaren eskualdeko zuzendaritza) erakundearen egoitzan otsailaren 3an. Mobilizazioaren bidez, sindikalistek enpresa oso tipietako hauteskundeetako emaitzak Euskal Herri mailakoak izatea eskatu dio erakundeari.

"Ipar Euskal Herriko TPE-en hauteskundeen emaitzak behar ditugu. Bertan erabakitzeko". Horrelako mezuak irakurri dira LAB sindikatuak Direccte egoitzaren sarreran jarritako pankartetan. Sindikatu abertzaleak eskualdeko erakundeari gutun bat helarazi dio bere aldarrikapenaren berri emateko xedez. Agiri baten bidez erran duenez, gutun bera igorri dio CGT sindikatuari.

Berriki eratu den Euskal Elkargoaren emaitzak jakinaraztea galdegin dio eskutitzean. Bere aburuz, eskualdeko emaitzak soilik ezagutzeak errealitatea okertzen du. Halaber, oroitarazi du Lurralde Komisio Paritarioa urte bukaeran sortuko dela. Horrek akordioak izenpetzeko gaitasuna ukanen du.

"Akordio horiek balioztatu aitzin izanen diren negoziaketentzat, sindikatu bakoitzaren ordezkaritza ezagutu beharko genuke eta horretarako noski, hauteskunde ezberdinen emaitzak lurralde mailan beharrezkoak izanen ditugu", erantsi du. Halaber, enpresa ertain eta handien hauteskundeen kasuan emaitzak enpresaz-enpresa jakinaraziko dituztela nabarmendu du.