Euskal Herriko Laborantza Ganbarako biltzar nagusia urtarrilaren 21ean

Euskal Herriko Laborantza Ganbarak 12. urtemuga ospatuko du urtarrilaren 21ean. Ekimenaren karietara, bere biltzar nagusia antolatuko du. Egitarauaren berri eman dute jadaneko.

Kazeta|2017/01/19 16:05|0 iruzkin
Ehlbg
Euskal Herriko Laborantza ganbarak biltzar nagusia antolatuko du urtarrilaren 21ean.

Heldu den urtarrilaren 21ean, biltzar nagusia antolatuko duela jakinarazi du Euskal Herriko Laborantza Ganbarak (EHLG). Egitaraua aurkeztu dute jadanik, eta goizean iraganen da ekitaldia, hamarretatik oren bata laurden gutti arte. Arratsaldean, 12. urtemuga ospatzeko ekimenak proposatuko ditu.

Besteak beste, 2017ko perspektibak zehaztu baino lehen, 2016an obraturikoaren puntua eginen dute. Ondotik EHLGk segitzen dituen desmartxa kolektiboak aurkeztuko dituzte, eta horrez gain kontuen aurkezpena eginen da.

Bestalde 2017ko urtea HELEParen sortzearena denez, EHLG nola kokatuko den entitate berri honen barnean esplikatu dute. Horrentzat, Batera plataforma, ELB sindikatua eta Jean-René Etchegaray Baionako auzapeza eta HELEPeko lehendakarigaia dena presente izanen dira. Bukatzeko, Eskualde Kontseiluko, Kontseilu Orokorreko, Eusko Jaurlaritzako, eta Nafarroako Gobernuko ordezkariek hitza hartuko dute goiz bukaeran.

Arratsalde alaitua

Urtebetetzearen karietara, bazkariaren ondotik, animazioak eta besta giroa izanen dela iragarri dute antolatzaileek. Besteak beste, KLI-K Txaranga, Tristtan Mourguy eta Horeba (folk / Donibane Lohizunen), Joujou (post-punk bikote minimala / Zokoa), Betunizer (Noise-Rock / Valencia), Zikiro Tendencies (Hard-core / Uztaritze) eta DJ XA2.

Bestalde, Euskal Moneta elkarteak erakusmahai bat izanen du egun horretan. Arratsaldean zehar, nahi duenak euskoz kontsumitu dezan truke etxe bat atxikiko du han bertan.