Abuztuaz geroztik Ibon Goieaskoetxea eta Aletxu Zobaran mobilizatuak zeuden Euskal Herrian hurbilduak izan daitezen aldarrikatzeko. Bi euskal presoak kartzelaz mugitu dituzte urriaren 20ean. Hain zuzen, Goieaskoetxea Arleseko presondegira eraman dute, Baionatik 605 kilometrotara. Zobaran, berriz, Saint-Martin de Réra 390 kilometro ingurura. Orain arte bi euskal presoak Valencen zeuden, hots, Baionatik 720 kilometrotara.

"Albiste gazi-gozoa da. Gauzak ez dira asko aldatuko guretzat; dena hain konplikatua izanen da", azaldu du Zigor Goieaskoetxeak Ibon Goieaskoetxearen anaiak. Bere aburuz, "hurbilketa partzial" bat da; "ez da galdetutakoa".

Erran bezala, bi euskal presoen helburua Euskal Herrira hurbilduak izatea zen. "Lannemesan edo Mont de Marsanera hurbilduak izateko xedea genuen. Helburura heltzeko borrokatzen segituko dugu", azaldu du Zigor Goieaskoetxeak.

Gaur egun Arleseko presondegian bi euskal preso daude. Halaber, Saint-Martin de Rén bost daude.