Jean Pitrau idealistaren bizia islatzen duen pastorala estreinatu zuten uztailaren 24an Atharratze-Sorholüzen. Orotara, 4.500 pertsonek bortuko laborantzaren defendatzailearen biziaren berri izan zuten. Horretaz gozatzeko aukerarik izan ez dutenek aukera berriak izanen dituzte heldu diren egunetan. Lehena abuztuaren 7an, Atharratze-Sorholüzen.
Pierre-Paul Berzaitz musikariak idatzitako pastoralak xiberotarraren bizia kontatzea baino urrunago joan zen. Hain zuzen, ildo ideologikoa gaur egun izango litzatekeena azaldu zuen. Pastoralaren idazlearen aburuz, "Jean Pitrauk laborariei beren duintasuna eman zien".
Estreinaldian arrakasta paregabea lortu zuen pastorala berriz eskainiko dute parte hartzen duten ehun bat herritarrek. Abuztuaren 15ean, Nafarroako bidea hartuko du, Otsagin eskainiko baitute. Azkenik, irailaren 17an, Parisera kontatuko dituzte laborari atharraztarraren nondik norakoak, Le Chalet antzokian emanaldia emanen baitute.