Uztailaren 27tik 31ra, Baionako bestek irauten duten artean, SNCF enpresak "Besten trena" martxan jarriko du. Hendaia-Baiona eta Akize-Baiona ibilbideak tren berezien bidez lotuko ditu.

Txartelak hamabi euroren truke eskuratu daitezke, enpresak agiri batean jakinarazi duenez. Jadanik SNCFaren webgunean salgai dira, baita tren geltokiko makinetan ere.

Txartel horiek trena hartu eta biharamunera arte erabili daitezke, goizeko 05.00ak arte hain zuzen. Ezingo dira beste batekin aldatu eta dirua ez da itzuli ahal izango, enpresak zehaztu duenez.

Segurtasun gehiago

Bestek iraunen duten bitartean, tren gidari gehiago izanen dira geltokietan eta trenetan. Xedea? "Tren berezi horien funtzionamendu egokia ziurtatzea". Postu anitzetako langileetaz gain, berrogeita hamar bat tren gidari boluntariok laguntza eskainiko dutela aipatu du SNCFk.

Gisa berean, segurtasuna ere indartuko dute. Burdinbideko polizia eta segurtasun indarrak tren geltokietan presente izanen dira.