Hazparneko zahar etxeko animatzaile bat zuzendaritzaren kontra jo zuen epaitegietan. Epaileak hobengabetzea erabaki prozesura arazo batengatik. LAB eta CGT sindikatuek zerbitzu horrek dituen baliabide eskasak eta zentro horretan dagoen interes aurkakotasuna salatu dituzte. Hazparneko auzapezak eta egituraren zuzendariak arazo pertsonalak eta erasotzeko saiaketa salatu dituzte.

38 urtez ospitalean lan egin ondoren, salaketa jarri zuen Marie-Gracie Hiriart bere ibilbidea horretan gelditu izanaz damutzen da. Zahar etxeko tratu txarrak salatu zituen anonimoki eta taldearen izenean ari zela erranez.

Sindikatuen ustez "terminoa eta egiteko manera traketsa izan daitezke", baina horrek ez die garrantzia kentzen gertakizunei. Hain zuzen ere, horren frogak "30 bat familiek osatu duten kolektiboa" eta gertakizunak salatzen dituen txostena dira. Azken horrek senideen lekukotasunak bildu ditu; sindikatuen iritziz "onartezina den errealitatea" da.

Lehen gutuna 2012an bidali zuten. Senide batek Miossec andereari zuzendutako idatzi batean "langileek errepresalietaz beldur" direla azaldu zuen. Halaber, beste batek hanka zikin eta beltzetan sartua zegoen azazkala bat aurkitu izana salatu zuen. Gisa berean, 2015ean bidalitako batean mediku batek bisita bakarrarentzat osasun karta bi aldiz pasa zuela salatu zuen. Zuzendariak beste alde batera begiratu duela diote.

"Txosten hori diziplina kontseiluan aurkeztua izan da", azaldu Eñaut Aramendi LABeko sindikalistak, kontutan hartzea errefusatu zuten ez zelako landu beharreko gaietan agertzen. "Ezin dute erran ez dutela gaiaren berri", gehitu du. Zuzendaritzaren abokatuak, Jean-Marc Chronnierrek txostena ez dutela auzian aurkeztu zehaztu du.

"Tratu txar pasiboetaz hitz egiten dugu", esplikatu du sindikalistak. Gainera, Jean-Louis Dupin CGTko kideak Baionako ospitalean ere baliabide eskasak atzematen ahal daitezkeela nabarmendu du.

Langileenganako presio iraunkorrak

Laurence Miossec zuzendariarentzat ez LAB ez eta CGT ere ez dira zahar etxeko sindikatuak, beraz ez du berekin harremanik izaterik. Ahatik, anonimoki, hiru langile sindikatu horiengana joan dira, "zahar etxean daudenek zuzendaritzarekin harreman zuzenak dituztelako". LAB eta CGTk FO sindikatuko Christian Heugaren adibidea eman dute, herriko kontseilaria dena ere. Halaber, langileenganako presio iraunkorrak eta mehatxuak salatu dituzte. Langileek azaldu dutenez, Beñat Inchauspek "edozer gauza salatuko balute auzitegira joko lukeela" erran zien.

Auzapezak akusazio horiek guziz errefusatu ditu. "Horrelako jarrerei aurre egiteko salaketak jarriko genituela adostu dugu zuzendaritzarekin. Gisa berean, langileei erran diet lehentasuna pertsonen zaintza dela eta ez arazoetaz eztabaidatzea lan orduetan", azpimarratu du Inchauspek.

Zuzendaritzaren abokatuak azaldu duenez, Eskualdeko Osasun Agentziak (ARS) ez luke txostena kontutan hartu, "ez zegoelako deus". "Erraten duena egia balitz, delitu bat litzateke eta agentziak ez luke pasatzen utziko. Kasu honetan frustratua den langile baten aitzinean gaude", gehitu du. Sindikatuentzat "ikerketa ez da burutu salaketa anonimoa izan delako". "Erantzunak exijitzen ditugu", aldarrikatu dute.