Lorentxa Guimon 2003an atxilotu zuten. Egindako baldintzapeko askatasunaren erantzuna azaroaren 24an jakinaraziko dute, Bagoaz kolektiboak azaldu duenez. Euskal presoen aldeko kolektiboak bere askatasuna aldarrikatzeko xedez, elkarretaratze bat antolatuko du egun berean 19.00etan Angeluko Herriko Etxean.
Angeluarra 2003an atxilotu zuten Estialescq herrian, Biarnon. "Tchernobyl" deitutako prozeduraren baitan beste 13 euskaldunekin batera epaitu zuten. Auzipetuei "ETAko kideak" izatea leporatu zieten eta angeluarra 17 urteko espetxe zigorrera kondenatu zuten. Gimonek Crohn deitutako eritasuna du. Gaixotasun kronikoak digestio aparatuan eragin zuzenak ditu, hestea hanpatzeko arriskua duelako.
Oroitarazi behar da Lorentxa Guimonek 39 eguneko gose greba burutu zuela 2010eko urtarrilean. Horren eraginez, euskal presoak 12,5 kilo galdu zituen. Hain zuzen ere, euskal presoak "isolamendu egoera eta bisiten kopuruaren murrizketa" salatu zituen. Azkenean, Roanneko kartzelako zuzendaritzatik Renneseko (Bretainia) espetxera bidaltzeko bermea jaso zuen. Gainera, bisita baimena guziak berreskuratu zituen.