Argitxu DUFAU

Etchebestia: epaileak arrazoia eman dio Grazi Etxebehereri

Garbi elkarteak erabaki zuenaren kontra joan eta epaileak Etchebestia eraikina diozesari ematearen erabakia deuseztatu du. Justiziak Grazi Etxebehereri arrazoia eman dio.

1955ean, jatorrizko jabeak Garbi elkarteari eman zion Etchebestia eraikina. Argazkia Bob EDME.
1955ean, jatorrizko jabeak Garbi elkarteari eman zion Etchebestia eraikina. Argazkia Bob EDME.

Baionako Auzi zibilen auzitegiak Ortzaizeko Etchebestia aferaren inguruko deliberoa argitaratu zuen azaroaren 2an, astelehenean. Catherine Dronde Garbi elkarteko presidenteak "epaileak eraikuntza Baionako diozesari emateko erabakia deuseztatu" duela azaldu du.

"Garbi elkarteak galdu du. Ez dugu ulertzen, nahasmendu handitan gara", gehitu du. Grazi Etxebehere erabakiarekin "pozik" agertu da, batez ere hori "aurrekari bat izanen delako".

"Sentimendua dut ez dudala galdu, baina aldi berean ez dut uste irabazi dudala", aipatu du Etxebeherek. Bere hitzetan, garaipenaren sentimendua elkarteak estatutuetan agertzen diren funtzioak beteko dituelarik ukanen du. Elkarteko lehendakariak erabaki horren helegitea aurkeztea edo ez erabakitzeko hausnartu behar duela gaineratu du.

Aurrekariak

Etchebestia eraikinak normetara egokitzeko berrikuntza lanak behar ditu, baina elkarteak ezingo lioke gastuari aurre egin. Arrazoin horrengantik, Baionako diozesari eskaini nahi zion, arraberritze lanen truke. Elkarteko kidea den Etxebeherek erabakiaren kontra jo zuen.