"Bil ta Garbi nun duzue egia?" gisako mezuak ikusi dira, ekainaren 1ean, Hazparneko Hazketa hondakindegian. Hazketa 2010eko kidea den Peio Durrutyren arabera, berrogei bat pertsonek "zerratze ofizialaren data" gogoratu duen mobilizazioan parte hartu du.

Duela 20 urte izenpetutako kontratuak Hazketa hondakindegia 2015eko maiatzaren 29an hetsiko zela adierazi zuen. Baina, "aterabide bat atzemaiteko" helburuarekin, Bil ta Garbi sindikatuak urte bateko luzapena eskatu du. "Tranpa egiten dute", azpimarratu du Durrutyk. Hazketa 2010eko kideek luzatzearen ordez aterabideak aurreikusi behar zituztela adierazi dute. "Guk behin baino gehiagotan abisatu ditugu", gehitu du.

Ingurumenari eginen dituen kalteak alde batera utzita, sindikatuak "populakuntza entzun gabe" erabakiak hartu dituela esplikatu du Peio Durrutyk. Erabaki horien kontra jotzeko, goizean elkarteko kideek, gendarmeekin batera, hondakindegiaren kamioiak kontrolatu dituzte.