LAB, CGT, FO, Solidaire edo FSU sindikatuek gizartean bizi den egoerari aurre egitea erabaki dute. Apirilaren 9an, ostegunarekin antolatutako manifestaldiaren bidez, besteak beste, Macron legea edo austeritatearen kontrako jarrera adierazi dute. 10.30etan abiatu den martxan, irakasleak, Errobiko artamendu zentroko langileak edo France Bleu irratiko langileak presente izan dira. Mobilizazioaren antolatzaileek 1.500 pertsonek parte hartu dutela adierazi dute.
"Austeritateari stop!". Apirilaren 9ko goizean Santa Ursuletik abiatutako manifestaldian islatu den aldarrikapen nagusia honakoa da. Eskolak hetsiak, hegaldiak ezeztatuak edo garraiobideak geldituak. Arlo pribatuko zein publikoko langileak batera ibili dira, norberak dituen kezkak adierazteko.
Alde batetik, France Bleu irrati publikoko langileak duela bi aste baino gehiago greban direla gogoratu dute eta entzuleen galderak erantzuteko prest agertu dira. Hitzordu ireki bat antolatu dute eguerdi huntan egoeraren berri emaiteko.
Bestalde, Itsasuko artamendu zentroko langileek beren egoeraren berri eman dute. Administrazioko langileak izan ezik, 44 langile apirilean etxean egoiteko pagatuak dira. Azkenik, irakasleek, besteak beste, eskolako kartak ekarriko dituen ondorioen kontra agertu dira.
Elkarrekin aldarrikatuz
CGTek manifestaldiarentzat egindako iragarpenean, "Macron legeak ondorioztatuko dituen erreformak sakrifizio berriak" ekarriko dituela adierazi du. Soldaten gorakada, emazte eta gizonen arteko berdintasuna, lan egiteko denboraren murrizketa, enpleguen sorrera edo laguntza sozialen erraztasunak manifestaldian azpimarratutako aldarrikapenak dira.
Sindikatu guztiek, CFDT eta UNSAk izan ezin, adierazpen hauekin bat egin dute. Halaber, Baionan iragandako martxaz gain, LAB sindikatuak Donapaleun 18.00etan elkarretaratze bat antolatu du.
