Apirilaren 6an Sarako idazleen biltzarraren 32. edizioa ospatuko da. Euskal Kultur Erakundeak, Sarako Turismo bulegoa eta Herriko Etxeak antolaturik, Lapurdiko herria euskal literaturaren topalekua bilakatuko da. Aurtengo edizioan, 120 idazle, 26 elkarte eta 23 argitaletxek parte hartuko dute. Euskaltzaindiaren aurkezpenak argitaratzeaz gain, Eneko Bidegain edo Marikita Tambourin idazleek beren obra berriak aurkeztuko dituzte.
Apirilaren 6an, Sarako Polikiroldegia Euskal Herriko idazleen topaleku bilakatuko da. Urtero bezala, Pazkoko astelehenean Sarako idazleen Biltzarra ospatuko da. 10.00etatik goiti, idazleek beren obrak aurkezteaz gain, bertan egonen dira liburuak izenpetzeko.
Hasiera batean Euskaltzaindiak bere argitalpenak aurkeztuko ditu. Hain zuzen ere, Henri Duhau-k "Bahnar deitu salbaiak" aurkeztuko du, Txomin Peillenen "Mongongo Dassanzaren albaitaritzako idazlana" obrarekin batera.
Erakusketak ere
Bestalde, Eneko Bidegainek "Lehen Mundu Gerra eta Euskal Herria" argitalpena aurkeztuko du. Modu berdinean, Marikita Tambourinek "Bi saiakera emazteen izenean" Maiatz argitaletxearen liburua erakutsiko du.
Liburuetaz gain, egunean zehar margoak, zizel-lanak edo esku lanen erakusketak egonen dira. Halaber, haurrentzat zuzenduak izanen diren bi ikastaro antolatu dituzte ere.