Pirineo Atlantikoetako kontseilariak hautatuak dira. Martxoaren 22 eta 29ko hitzorduak eta gero, zentro-eskuinak garaipen argia lortu du. Orotara 27 kantonamenduetatik, 16etan boz kopuru gehiena lortu du. Ezkerrak hamar kantonamenduetan gehiengoa izan du eta EH Baik Errobi-Aturriko eremuan. Bidaxunen berriz hautatua izan den Jean-Jacques Lasserrek departamenduko lehendakaria izaiteko posibilitate gehien ditu.
Martxoaren 29ko departamenduko hauteskundeen bigarren itzuliaren harira, departamenduan, zentro-eskuina boz gehien lortu dituen alderdia da. 27 kantonamenduetatik, 16etan garaipena lortu du: zortzi Biarnon eta beste zortzi Ipar Euskal Herrian. Bestalde, ezkerrak hamar kantonamenduetan irabazi du: zazpi Biarnon eta hiru Ipar Euskal Herrian. Hain zuzen ere, Hendaia, Baiona 2 eta Baiona 3n. Azkenik, abertzaleek departamendu mailan, Errobi-Aturriko kantonamenduan Fronte Nazioanalaren kontrako lehia irabazi dute.
Lehen itzuliko emaitzen ondotik, abertzaleek bost kantonamendutan izaitea lortu zuten, baina bakar batean hautatuak izan dira. Hala ere, hauteskunde hauetan lortu dituzten emaitzak harrigarriak izan dira; orotara 25.332 boz lortu dituzte. Datu horrek bere ingurunetik kanpo diren sustenguak lortu dituela frogatu du.
Lehendakari berria
Emaitza definitiboak iragarri ondoren, Pirineo Atlantikoetako Departamenduko kontseilu zentro-eskuina, UMP eta ezkerreko taldeetaz osatua da. Heldu den apirilaren 2an, 54 kontseilariek osatzen duten asanbladak departamenduko lehendakari berria hautatuko du.
Dirudienez, kargu hori lortzeko aukera gehien duen kontseilaria Jean-Jacques Lasserre da, Bidaxune, Amikuze eta Oztibarreko kantonamenduan hautatua da. UMPk kontseilariari zentristari sustengua emanen diola iragarri du. Beraz, dirudienez Anne-Mairie Bruthen binonioak 2008an galdutako eserlekua berreskuratuko du.
Halaber, mementuz EH Baik ez du argi zer eginen duen. Alderdiak heldu den egunetan zein jarrera izanen duen aztertuko duela adierazi du.
Orotara, parte hartze datua %53,34ekoa izan da; 2011. urtean 49,41ekoa izan zen. Joan den asteari konparatuz, abstentzio datua antzekoa izan da: %48,72koa.
