goizeder taberna

EHLGren hamar urteak aitzurra eskuan jorraturik

Euskal Herriko Laborantzaren hamar urteetaz gain, Mixel Berhocoirigoinen kargu uztea ospatu dute Ainhiza-Monjelosen, urtarrilaren 17an.

Aitzurra eta styloa eskeini diote Mixel Berhocoirigoini. (Bob EDME)
Aitzurra eta styloa eskeini diote Mixel Berhocoirigoini. (Bob EDME)

Zikiro usaina eta festa giroa zen urtarrilaren 17 huntan Ainhiza-Monjelosen. Jendez gainezka. Euskal Herriko laborantza ganbararen (EHLG) 10 urteak ospatzera etorriak ziren denak. Ospakizun berezia, beraz, iraganari behako bat emaiteko parada, baina burua etorkizuneruntz begira. Hala egin du elkartearen lehendakariak, Mixel Berhocoirigoinek, bere tokia kide bati utzi baino lehen.

"Erakundeen ezagupenik gabe, Euskal Herriko Laborantza Ganbarak minimetra bakoitza, euro bakoitza, toki, partaidetza edota konfiantza bakoitza beraurek irabazi behar izan du", oharrarazi du laborariak. Lan horren emaitza zenbakitan laburbiltzen ahal da : hamar urtez, arlo askotariko 8 500 interbentzio bete ditu EHLGk ; egun, denbora osoz ari diren 15 langilek osatzen dute eta 700 000 euroko budxeta du.

Lan horren guziaren itzain agertu da M. Berhocoirigoin hamar urtez. Omentzeko, aitzurra eta styloa eskeini diote kideek. Segurenik, oraindik biak erabiliko ditu zonbait denboraz elkarteko bulegoan geldituko baita. Ordezkoaren izena otsailaren 20an ezagutuko da. Goizeko hitz hartzeetan, partaideek ere omendu dute lehendakaria. Han ziren, hitza hartzeko edo publikoan, Frantxua Maïtia, eskualdeko eta departamenduko kontseilaria, Ainhoa Muñoa, ELA sindikatako kidea, Frédérique Espagnac senataria, Jean-René Etchegaray Baionako auzapeza eta Martine Bisauta haren axuanta.

Segidak gainditu beharko duen desafioa bikoitza da, Berhocoren ustez : laborantza iraunkorra garatzen segitzea, "lurralde huntan laborari gero eta gehiago izan" daitezen eta EHLGren helburuak eta izpiritua biziaraztea. EHLGra proiektu alternatiboa gelditzea nahi dute horren kideek, "alternatiboa, helburuetan eta funtzionamenduan".

EHLGren lehen aldarrikapena ahantzi gabe, hots, laborantza ganbara ofizialarena, M. Berhocoirigoinek laborantza balizko ipar Euskal Herriko erakunde berriaren kuadroan izan beharko dela azpimarratu du. "Laborantzari kuadro bat eman behar zaioa" erranez bukatu du.