Kazeta

Puigdemont aske hauteskundeetan parte hartu ahal izateko

Carles Puigdemontek eta berarekin batera Belgikan dauden lau kontseilariek epailearen aitzinean deklaratu dute azaroaren 5ean. Barda bostak aske uztea erabaki du justiziak. Hori dela eta, abenduaren 21ean iraganen diren hauteskundeetan parte hartzen ahalko du lehendakariak.

Carles Puigdemontek Belgikako telebistan eskainitako elkarrizketaren irudia.
Carles Puigdemontek Belgikako telebistan eskainitako elkarrizketaren irudia.

Azaroaren 2an Auzitegi Nazionalean ez aurkezteagatik, Carles Puigdemont eta berarekin batera dauden lau kontseilariak atxilotzeko agindua eman zuen Estatu espainiarreko justiziak. Hori dela eta, Puigdemont eta Clara Ponsati, Toni Comin, Lluis Puig zein Meritxell Serret kontseilariak poliziarengana joan ziren azaroaren 5ean, beren kabuz. Arratsaldean epailearen aitzinetik deklaratu eta, aske utzi zituen epaileak. Haatik, kautelazko neurri batzuk bete beharko dituzte. Belgikako prokuradoreak baieztatu duenez, Puigdemont eta lau kontseilariek epailearen aitzinean deklaratu beharko dute azaroaren 17an.

Puigdemont eta bost kontseilariak ezin dira Belgikako herrialdetik atera. Horrez gain, eskatzen zaienean epaitegian agertu beharko dira. Pasaportea ere kendu die epaileak. Libre utzi eta, bi hilabeteko epea du Belgikako justiziak Estatu espainiarraren eskaerari erantzuteko.

Baldintzak kontutan harturik, Puigdemontek abenduaren 21ean iraganen diren hauteskundeetan parte hartzen ahalko du. PDeCAT alderdiak lehendakaria zerrendaburu gisa aurkeztuko duela iragarri zuen asteburu honetan. Oroitarazi behar da koalizioak bozetara aurkezteko epea azaroaren 7an bukatzen dela. CUP alderdiak oraindik ez du bere erabakiaren berri eman. Azaroaren 12ko batzarrean militanteek hauteskundeei buruzko erabakia hartuko dute.

Kontrako ahotsak biderkatuz doaz

Belgikako Barne ministroa den Jay Jambonek gogor kritikatu du Estatu espainiarraren jarrera. Sare sozialen bidez, Gobernu espainiarreko buruari "urrunegi" joatea egotzi dio. "Zer egin dute gaizki? Hautesleek emandako mandatua bete besterik ez dute egin", galdetu du Jambonek.

Mariano Rajoyk plantan ezarritako 155. artikuluaren kontra jotzeko eta erabakitzeko eskubidea defendatzeko 44.000 pertsona batu ziren azaroaren 4an Bilbon. Gure Esku Dago dinamikak antolaturik, Jordi Sanchez eta Jordi Cuixarten baita Generalitateko kideen erdia atxilotu izana ere salatu zuten mobilizazioan.

Gisa berean, ehunka pertsona batu ziren igandean Iruñeko herriko etxearen aitzinean "atxilotuak askatu" aldarria ozen entzunarazteko.