Irailaren 17an Bokalen atxilotutako 38 urteko gizonak Uztaritzeko erailketa aitortu duela dio EITB komunikabideak. "Toki bat bilatzen omen zuen gaua pasatzeko", azaldu du hedabideak. Emazteak ustekabean atzeman luke.

Oroitarazi behar da etxegabea den gizonezkoaren arrasto biologikoak atzeman zituztela erailketaren eremuan. Bi egun eman zituen poliziak bere gibeletik eta azkenean, Bokalen atxilotzea lortu zuen. Suitzan sortutako gizonak ebatsia izan zen kamioi bat gidatzen zuen. Hain zuzen, irailaren 16an ebasketa dela eta, salaketa bat aurkeztua izan zen Angelun.

Gizonezkoaren atxiloaldia luzatzea erabaki du justiziak. Galdeketa gehiago egin zizkioten prokuradorea eta jendarmeek atzo. Astearte honetan, prokuradorearengana eramanen dute berriz. Ondotik, ikerketa epailearen aitzinetik pasatu beharko da.

Informazio gehiagoren esperoan

Zutik Indarkeria Sexisten kontrako kolektibo feministak "etsituta" dagoela adierazi du agiri baten bidez. Haatik, "drama" horren xehetasun guztiak kontutan hartu behar direla aipatu du. Ezohiko egoera baten aitzinean dagoela azpimarratu du. "Pertsona bat atxilotua izan da, dirudienez arazo psikologikoak ditu", erantsi du.

Informazio gehiago jasotzea lehenesten duela erran du kolektiboak. Etorkizunean hartuko duten erabakia alde batera utzita, "eritasun mentalak pairatzen dituzten pertsonen estigmatizazioa saihestea funtsezkoa iruditzen" zaio.

Hego Euskal Herriko lau hiriburutan Uztaritzeko erailketa baita emakumeen kontrako indarkeria ere deitoratzeko elkarretaratzeak egin zituzten barda.

Ustaritzen gertatutako hilketa matxista bortitza salatzeko elkarretaratzea Iruñean. Mélodie eta besteak, gogoan zaituztegu! pic.twitter.com/T1fXW0CRiS

— Bakartxo Ruiz (@BakartxoR) 2017(e)ko irailak 18