Luzaideko Bolanten batzordeak galdeketa bat antolatu zuen iragan astean. Luzaiden erroldatuek, dantzariek eta dantzari ohiek hiru galderei erantzun zieten: "mutilek egiten duten bezala, neskek dantza taldean parte hartzearen alde zaude? Hala bada, nola jantzita? Zein pertsonaia ordezkatu beharko lukete?".

Orotara martxoaren 24, 25 eta 26an antolatu ekimenean 160 bat pertsonek beren iritzia plazaratu dute. Parte hartu dutenek galdeketa horren emaitza apirilaren 1ean jakinen dute.

Luzaideko Bolant eguna martxoaren 27an iragan zen. Ehunka pertsona hurbildu ziren egunean zehar ehun dantzarik baino gehiagok eskaini zuten ikusgarriaz gozatzera. Goizean herriko plazan hainbat emanaldi eskaini zituzten eguzki izpien artean. Arratsaldean, berriz, ikuskizuna Arretxe pilotalekuan eman zuten.