Amikuze herri elkargoko lehendakariordea den Barthélémy Aguerrek Biarnorekin bat eginen lukeen herri arteko elkargune proiektua proposatu zuen. Proposamen hori bozkatu zuten CDCI departamendu mailako kontzertazio batzordearen bilkuran, urtarrilaren 18an, astelehenean. Aguerrek ez du beharrezkoa den sostengua jaso; euskal hautetsien gehiengoak arbuiatu du.
Hain zuzen ere, hogeita bat hautetsik kontra bozkatu zuten, hamaikak alde eta bost abstenitu ziren. Ondorioa argia da: Amikuzek Ipar Euskal Herriko herri elkargo bakarrean sartuko da. Ipar Euskal Herriko lurraldeak ez du Sauveterre, Salies eta Navarrenkoxekin bat eginen. Amikuzeko lehendakariordeak Euskal Herriko bi hautetsiren babesa soilik jaso zuen: Anthony Bleuzena eta Claude Oliverena; biak Errepublikanoak.
Bathélémy Aguerrek egindako proposamenaren kontra iritzi asko agertu ziren, Jean-René Etchagarayrena, Beñat Inchauspérena eta politikan beregandik hurbil dagoen Jean Lassalle Pirinio Atlantikoetako diputatuarena, besteak beste. Orokorrean kritikek mezu bera azaldu zuten: Ipar Euskal Herrian gailendu den hiri elkargo bakarraren aldeko iritziari bizkarra ez ematearen betebeharra.
Biarnoko proiektua aztertzeko antolatu zuten CDCIaren azken bilkura hori. Ipar Euskal Herriko hiri elkargo bakarraren egitura urtarrilaren 15ean landuko dute. Bilkura iragan arte hautetsiek emendakinak proposatzeko parada dute.
CDCIan parte hartzen duten euskal herritarrak:
Xavier Lacoste - Irisarriko auzapeza
Claude Olive - Angeluko auzapeza
Max Brisson - Biarritzeko kontseilaria
Jean-René Etchegaray - Baionako auzapeza
Kotte Ecenarro - Hendaiako auzapeza
Beñat Inchauspé - Hazparneko auzapeza
Anthony Bleuze - Euskal Kosta-Aturriko lehendakariordea
Roland Hirigoyen - Errobi-Aturri herri elkargoko lehendakaria
Barthélémy Aguerre - Amikuze herri elkargoko lehendakariordea
Paul Baudry - Errobi herri elkargoko lehendakaria
Dominique Boscq - Xiberoa herri elkargoko lehendakaria
Peyuco Duhart - Hego Euskal Herriko hirigune elkargoko lehendakaria
Vincent Bru - Baigura-Mondarrain eskualdeko kontseilaria
Alain Iriart - Errobi Aturriko eskualdeko kontseilaria
Mathieu Bergé - Akitania eskualdeko kontseilaria
