Kazeta

Geroari "baietz" erran diote aurrekaririk gabeko Diadan

IRUDITAN- Irailaren 11n iragan den seigarren Diada inoiz baino bereziagoa izan da. Milioi bat pertsona geroari begira jarri dira Bartzelonako karrikak betez. Urriaren 1erako antolatu duten erreferendumaren alde agertuz, erabakitzeko eskubidea aldarrikatu dute.

Irailaren 11n iragan den Diada gainetik ikusita. (Assemblea Nacional Catalana)
Irailaren 11n iragan den Diada gainetik ikusita. (Assemblea Nacional Catalana)

Abuztuaren 17ko gertakarien omenez, minutu bateko isilunea burutu zuten Diadako ekitaldi nagusia aitzin. Txalo zaparradak eztanda egin ondoren, "Els Segadors" ereserkia ozen kantatu zuten Bartzelonako karrikak bete zituzten milioi bat pertsonek. Errepublika independente bat nahi duten edo ez erabakitzeko eskubidearen aldarria nagusitu zen seigarren Diadan.

 

Urriaren 1erako antolatu duten erreferendumaren aldeko mezuak indartsu agertu ziren atzo arratsaldean. Hain zuzen, hori baita katalanek eskatzen dutena libreki bozkatzea eta beren etorkizunari buruzko erabakia hartzea. Oztopo guztien gainetik. Hain zuzen, irailaren 12an espero da Auzitegi Konstituzionalak Trantsiziorako Legea bertan behera eskatzeko agiria bidaltzea.

 

Euskal Herritik joandako hiru ordezkaritza nabarmendu ziren aurtengo Diadako ekitaldietan. Batetik, azken urteotan bezala, Independentistak sarearena, "euskal tramua" delakoa berdez margotuz. Bestetik, EAJrena, Andoni Ortuzar EBBko presidentea buru. Eta osatuagoa, EH Bildurena, Arnaldo Otegirekin batera ordezkari askotxo bertaratu baitzen. Erreferenduma eta "bide katalana" laguntzeko ahaleginean gogoz dihardute EH Bildukoek. EAJk, ordea, beste behin ere elkartasuna agertu baina aldea markatzeko baliatu zuen bidaia.